Mabaskog nga ginamanduan sang Leonardo Panaligan Command-New People’s Army (LPC-NPA) sa Central Negros ang tanan nga mga yunit sang NPA, yunit milisya kag iban pa nga yunit gerilya sa idalom sini nga hugot kag istrikto nga ipatuman ang apat ka adlaw nga untat-lupok sang Communist Party of the Philippines (CPP) paagi sa Komite Sentral. Ang apat ka adlaw magasakop sa alas 12:00 sang aga sang Disyembre 25 tubtob alas 11:59 sang gab-i sang Disyembre 26, 2025 kag alas 12:00 sang aga sang Disyembre 31, 2025 tubtob alas 11:59 sang gab-i sang Enero 1, 2026.

Tuyo sini nga mahatagan ligwa ang pumuluyo sa pagsaulog sang mahilwayon nga paskwa kag bag-ong tuig sa tunga sang masalimuot nga krisis kag kapigaduhon nga gindulot sang inutil, korap kag pasistang rehimeng US-Marcos Jr. Ginalakip man ang pagsaulog sang masa upod sa bug-os nga rebolusyonaryong kahublagan kaangot sa ika-57 ka tuig nga pagsukat sang CPP gikan sa iyang pagkatukod sadtong Disyembre 26, 1968.

Militante ini nga saulugon CPP-NPA-National Democratic Front (NDF) sa prenteng gerilya ang naangkon nga mga kadalag-an sa ideolohiya, pulitika kag organisasyon sa espiritu kag giya sa pagpatuman sang kahublagan panadlong. Hugot nga konsolidahon ang Partido, NPA kag baseng masa sa napunpon nga mga bulawanong leksyon sa liwat nga pagpalambo kag komprehensibong pagpalig-on sa tanan nga bahin sang pagsulong sa palaabuton.

Ginamanduan man ang tanan nga yunit sang NPA nga ipaseguro ang postura sang aktibo nga depensang moda. Mag mangin alerto bilang paghanda nga mapreserbar ang kabug-usan nga kusog sang Partido, NPA kag depensahan ang masa sa wala-puas kag patraidor nga pagpang-atake sang mapintas nga estado paagi sa reaksyonaryong makinaryas sini nga Armed Forces of the Philippines, Philippine National Police, paramilitar kag mga traidor sa rebolusyon.

The post Deklarasyon nga 4 ka adlaw nga untat-lupok sang CPP-NPA, istrikto nga Ipatuman! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.